Áhugaverðir staðir : Hrafntinnusker

Hrafntinnusker er 1128 m hátt fjall við Austur-Reykjadali, austan Heklu. Það er hægt að aka langleiðina þangað frá Sátubarni á Dómadalsleið eða Laufafelli á Miðvegi. Útsýni er mikið og gott af Skerinu, sem er á Laugaveginum, gönguleiðinni milli Þórsmerkur og Landmannalauga.
Á vetrurna er þetta svæði mjög vinsælt hjá vélsleðamönnum ekki síður en hjá jeppamönnum. Þar er ágætisáningarstaður í skála Ferðafélagsins, sem var byggður 1977. Hann rúmar 20 manns.
Umhverfis skerið, einkum vestan við það, er fjöldinn allur af hverum, enda er Torfajökulssvæðið meðal stærstu háhitasvæða landsins. Þarna eru gufuhverir, litskrúðugir leirhverir, sígjósandi vatnshverir og aðrir rólegri. Sumir eru undir jökli og mynda íshella. Litadýrð þessa ríólítsvæðis er ólýsanleg.
Hrafntinnuhraun, norðvestan Hrafntinnuskers, er samnafn á misgömlum hraunum. Hið yngsta gæti hafa myndast á sögulegum tíma. Yngsta hraunið skartar hringlaga gíg, sem varð að gúl vegna þess að hraunið var seigfljótandi og hrannaðist upp. Stundum var sótt hrafntinna til húsaskreytinga í Hrafntinnusker, m.a. er hrafntinna á Þjóðleikhúsinu.

Til baka